Ուրբաթ, 22 Սեպտեմբերի 2017թ. Անկախության 26-րդ տարեդարձն Իջևան քաղաքում |  Իջևանում մեծ շուքով նշվեց անկախության 26-րդ տարեդարձը:
Առավոտյան Սահմանադրության հրապարակում տեղադրվեց Աշոտ Երկաթ թագավորի արձանը: Իջևանի բժշկական կենտրոնի տարածքում օծվեց խաչքար, որը ստեղծվել է մոսկվայաբնակ իջևանցիներ Արտակ և Արմեն Իսկանդարյանների հովանավորությամբ:
Սահմանադրության հրապարակից կայացավ հանդիսավոր երթ զինվորական նվագախմբի ուղեկցությամբ: Երթին մասնակցում էին Իջևան համայնքի ղեկավար Վարդան Ղալումյանը, Տավուշի մարզպետի տեղակալներ Լևոն Սարգսյանը և Վարդան Ալեքսանյանը, Հայ Առաքելական եկեղեցու թեմի առաջնորդ Տեր Բագրատ եպիսկոպոս Գալստանյանը և բազում իջևանցիներ: Երթի մասնակիցները ծաղկեպսակ և ծաղիկներ դրեցին Ազատամարտիկների հրապարակում` ի խոնարհումն զոհվածների հիշատակին:
Շնորհավորանքի խոսքով հանդես եկավ Տավուշի թեմի առաջնորդ Տեր Բագրատ եպիսկոպոս Գալստանյանը` հնչեցնելով Տերունական և խաղաղության աղոթքներ: Տոնակատարությունը շարունակվեց Իջևանի մշակույթի տանը, որտեղ երաժշտական միջնակարգ դպրոցի ժողգործիքների համույթը հիանալի կատարումներով բարձր տրամադրություն հաղորդեց հանդիսատեսին: Հայրենասիրական երգերը լրացվում էին մշակույթի տան գեղմասվար Գայանե Չապուխյանի գեղեցիկ խոսքով և ասմունքով: |
|
|